Von Habsburg

Il num da famiglia von Habsburg deriva dal chastè da Habsburg che giascha en il chantun Argovia dad oz. L’onn 1273è Rudolf von Habsburg daventà imperatur tudestg; a partir dal 1438 enfin la fin da l’imperi l’onn 1806 ha la famiglia occupà quasi nuninterruttamain questa posiziun da pussanza. Cumbain ch’il center da la pussanza territoriala da la famiglia è sa spustà vaira baud en direcziun da l’Austria odierna, èn las relaziuns cun la Republica da las Trais Lias restadas ordvart entretschadas (en spezial en las Otg Dretgiras ed en l’Engiadina Bassa). Pir il 1803 ha il chantun Grischun surpiglià il signuradi da Tarasp; il domini da Razén è schizunt restà fin il 1809 en possess habsburgais.